തോപ്പുംപടി: ഉറങ്ങിക്കിടക്കുന്ന ഭാര്യയെ വെട്ടിക്കൊലപ്പെടുത്തിയതിനു ശേഷം ഭർത്താവ് തൂങ്ങി മരിച്ച സംഭവം വിചിത്രമായ കൊലപാതകമെന്ന് പോലീസ്. പകപോക്കുന്നതിനും ഒരാളെ ഇല്ലാതാക്കുന്നതിനുമാണ് സാധാരണ കൊലപാതകങ്ങൾ നടക്കാറുള്ളത്. പക്ഷേ ഭാര്യയോടും മക്കളോടുമുള്ള അമിത സ്നേഹമാണ് കൊലപാതകത്തിൽ കലാശിച്ചതെന്ന് പോലീസ് പറഞ്ഞു.
“ഇത്ര നല്ലൊരു ഭാര്യയെ ആർക്കും കിട്ടില്ല, അത്രയും നല്ലവളാണ് എന്നാണ് റഫീക്കിന്‍റെ ആത്മഹത്യക്കുറിപ്പിൽ പറയുന്നത്. അതേ പോലെ സംഭവത്തിന് മുൻപ് മക്കൾക്ക് ഇഷ്ടപ്പെട്ട മസാലദോശയും വാങ്ങി കൊടുക്കുകയും ചെയ്തു.”അവർക്കിനി മസാല ദോശ കഴിക്കാനാവില്ലല്ലോ എന്നും കുറിപ്പിൽ സൂചിപ്പിച്ചിട്ടുണ്ട്.
ആത്മഹത്യ ചെയ്യാൻ നേരത്തെ തന്നെ ഉറപ്പിച്ച റഫീക്ക് തന്‍റെ മരണശേഷം കുടുംബം അനാഥമാകുമെന്ന ചിന്തയിലാണ് എല്ലാവരേയും കൊല്ലാൻ തീരുമാനിച്ചതെന്ന് പോലീസ് പറയുന്നു. തന്‍റെ കുട്ടികൾക്ക് വേണ്ടി ഒന്നും കരുതി വയ്ക്കുവാൻ സാധിച്ചില്ലെന്ന എന്ന വിഷമവും ആത്മഹത്യക്കുറിപ്പിൽ സൂചിപ്പിച്ചിട്ടുണ്ട്.
ചുമട്ടുതൊഴിലാളിയായ റഫീക്ക് എവരോടും സ്നേഹത്തോടെ ഈ പഴകിയിരുന്ന റഫീക്ക് കുടുംബവീട്ടിൽ നിന്ന് പണയത്തിനെടുത്ത വീട്ടിൽ നിന്ന് താമസം മാറിയ ശേഷം അസ്വസ്ഥനായിരുന്നു. രണ്ടാഴ്ച്ചയായി ഭക്ഷണം പോലും കൃത്യമായി കഴിക്കാറില്ലായിരുന്നുവെന്ന് കുട്ടികൾ പോലീസിനോട് പറഞ്ഞു.
ഇരുവരുടേയും മൃതദേഹം വൻ ജനാവലിയുടെ സാന്നിധ്യത്തിൽ ഇന്നലെ കൊച്ചങ്ങാടി ചെമ്പിട്ട പള്ളിയിൽ സംസ്ക്കരിച്ചു. സംഭവത്തിൽ വെട്ടേറ്റ് ആശുപത്രിയിൽ കഴിയുന്ന മക്കളായ ജെഫ്റിൻ (21) ഷെഫിൻ (18) സാനിയ (13 ) ഗുരുതര പരിക്കുകളോടെ എറണാകുളത്തെ സ്വകാര്യ ആശുപത്രിയിൽ ചികിത്സയിലാണ്
